Gulchehra NURULLAYEVA

TINGLOVCHI DEYDIKI…

“Amerika ovozi” radiosining o’zbek xizmati necha yillar mobaynida o’zbekistonliklar xizmatida bo’lib kelyapti. Ho’sh, u o’z tinglovchilari uchun qanday ovoz? Uning bo’lak xorijiy to’lqinlardan farqi, o’ziga xosligi bormi? Ushbu to’lqin haqida uning tinglovchilari qanday fikrdalar?

Mustaqil jurnalist BOBOMUROD ABDULLAYEV: - Albatta, boshqa xorijiy ommaviy axborot vositalari, jumladan, “Ozodlik” va “Bi-Bi-Si”dan farqli o’laroq, “Amerika ovozi”ning alohida o’rni bor edi. Nega desangiz, gapirish imkoniyati yo’q bo’lgan muxolif pozitsiyadagi odamlarga ko’proq imkoniyat bergani uchun, menga “Amerika ovozi” ko’proq yoqardi. Muxolifat uchun ochiq minbarday joy edi-da. Keyin “Amerika ovozi”ning boshqa radiolar qila olmagan ishi bor. “Saltanat sirlari yoki Oq saroydagi qora ishlar” deb, ( 2003 yilning Avgustida havoga uzatilgan, muallifi J. Mamatov) Karimovning qizini “Amerika ovozi” birinchi ochdi. Agar “Amerika ovozi” yopilib, nomi unutilib ketsa ham, uning shu qilgan ishi hech qachon esdan chiqmaydi. Karimov oilasining sirlarini, ularning moliyaviy firibgarliklarini, qizlarining qilgan ishlarini birinchi bo’lib ochgan – “Amerika ovozi”.

Inson huquqlari himoyachisi ABDUJALIL BOYMATOV: - “Amerika ovozi”ning o’ziga xos xususiyatlaridan biri, masalan, o’tgan yillar Islom Karimovning qizi to’g’risida, kuyovi to’g’risida juda ko’p materiallar yoritildi, (“Saltanat sirlari yoki Oq saroydagi qora ishlar” turkumi, 2003 yilning Avgustida havoga uzatilgan, muallifi J. Mamatov)ya’ni “BBC”, “Ozodlik” yoritmaydigan ko’p temalarni ko’tarib chiqqandi. SHu narsalar menga juda ma’qul kelardi. “Amerika ovozi” eshittirishini boshlagan paytda nihoyatda shovqinlar boshlanadi. SHu hukumat tomonidan bo’g’ishlar…Ataylab…Ayniqsa, 2004 yilning yanvar oyidan boshlab bo’g’ishlar nihoyatda kuchayib ketdi.