Demokratik O’zbekiston Kongressi (DO’K)ning ish yuritish

NIZOMI

1. Demokratik O’zbekiston Kongressi (DO’K) diktaturaga qarshi, demokratiyaga tarafdor shaxslar va guruhlarning 2005 yil 18 Noyabrda AQShda ro’yxatdan o’tgan tashkilotidir.

2. DO’Kka a’zo bo’lish ixtiyoriy hisoblanib, Kongressning O’zbekiston bo’limi Toshkentda rasman ro’yxatdan o’tguniga qadar a’zolarining majburiyatlari ularning o’z tashabbuslariga bog’liq bo’ladi. DO’K faoliyatida aktiv qatnashganlar DO’K himoyasida bo’ladilar va ularning muammolarini hal etishda DO’K o’z hissasini qo’shadi. Ular DO’K tarqatadigan nashrlar, kitoblar va hujjatlarni olib turish imkoniga ega bo’ladilar.

3. DO’K AQSh qonunlari asosida ishlaydi va O’zbekistonda ham ro’yxatdan o’tgan taqdirda O’zbekiston qonunlariga rioya etadi. BMT inson huquqlari Deklaratsiyasida belgilangan haqlar O’zbekistonda qaror topishi uchun demokratik yo’l bilan faoliyat ko’rsatadi, zo’ravonlikning har qanday ko’rinishini rad etadi;

4. DO’K tuzilishi ish yuritadigan rahbariyat (besh yoki yetti kishilik), Maslahat kengashi va tashkilotning turli joylardagi bo’limlaridan iborat bo’ladi. DO’K rahbariyati va Maslahat kengashi tashkilot ishini yuritish uchun o’z ixtiyorlari bilan muntazam a’zolik badali to’laydilar. A’zolardan esa doimiy badal olinmaydi, ammo tashkilot amalga oshiradigan loyihalar uchun xayriya qilishlari mumkin bo’ladi.

5. DO’K rahbariyatiga uning go’ya va maqsadlari yo’lida astoydil xizmat qilgan, xizmat qilayotgan, uni moddiy jihatdan qo’llab quvvatlayotgan kishilar saylanadilar. DO’Kning demokratiyaga tarafdor va diktaturaga qarshi bo’lgan yo’lini inkor etgan shaxslar rahbariyat qarori bilan boshqaruv tarkibidan, maslahat kengashidan chiqariladi va ular tashkilot a’zosi hisoblanmaydilar.

6. DO’K Kongress raisi, raisning birinchi o’rinbosari, o’rinbosarlar va ijrochi direktor maqomlariga ega bo’ladi.

7. Rais va o’rinbosarlar rahbariyatning majlisida saylanadilar. Xizmat davri olti yil bo’lib, rahbariyat a’zolari eng ko’p ikki marta saylanish huquqiga egadiralr. Maslahat kengashi yoki faollar majlisi o’rni bo’shab qolgan rahbariyat a’zoligiga nomzodlar ko’rsatishlari mumkin.

8. DO’K Maslahat kengashi maslahat ovoziga ega bo’lib, DO’K ishida faol ishtirok etaman degan shaxs unga a’zo bo’lishi mumkin. Ammo uzrsiz sabab bilan bir oy DO’K faoliyatida qatnashmagan (tashkiliy, moddiy va ma’naviy tomondan) faol Maslahat kengashidan chiqqan hisoblanadi.

9. Demokratik O’zbekiston Kongressi raisi, birinchi o’rinbosari va o’rinbosarlar Kongress Nizomi va Dasturi asosida ish yuritadilar.

10. DO’K Parlamentar tartibda foaliyat yuritadi va muhim qarorlar rahbariyat, Maslahat kengashi a’zolari orasida to’g’ri yoki bilvosita (telekonferensiya, elektron maktublashma orqali) ko’pchilik ovoz bilan qabul qilinadi.

11. DO’K o’z nashrlariga ega bo’lish, muhim voqealar, demokratiya talablari, inson huquqlari toptalishi, siyosiy erkinliklar poymol etilishi kabi hollar munosabati bilan bayonotlar tarqatish, murojaatlar bilan chiqish vakolatiga ega.

12. DO’K irqiy kamsitilish hollarini vujudga keltiradigan, millatlararo tafovutni keltirib chiqaradigan, millliy va diniy nizolarga bois bo’ladigan har qanday faoliyatdan o’zini tiyadi va bunga qarshi chiqadi.

13. Demokratik O’zbekiston Kongressi o’z faoliyatini moliyaviy ta’minlash masalasini rahbariyat qarorlari asosida amalga oshiradi. Bu haqda Maslahat kengashiga oyda bir marta, Kongress a’zolariga yilda bir marta hisobot taqdim etadi.

14. Tashkilot o’z veb sahifasi, o’z ramzi va o’z muhriga ega. Demokratik O’zbekiston Kongressi - The Congress of Democratik Uzbekistan- AQSh qonunlariga ko’ra tashkilot asoschisi tomonidan corporatsiya nomi sifatida band qilingan va bu nomni boshqa shaxs yoki guruhlar qo’llana olmaydi.

15. DO’K rahbariyatiga kirgan shaxslarning vazifalari quyidagilardir:

I. DO’K raisi

1.Tashkilot faoliyatiga umumiy rahbarlik, DO’Kning siyosiy islohotlar borasidagi dasturini tayyorlash, amalga oshirishga rahbarlik qilish;

2.Tashkilot, uning a’zolari va boshqa demokratik tashkilotlar bilan faoliayatni muvofiqlashtirish;

3.Tashkilot bayonotlarini, hujjatlarini tayyorlash bo’yicha muhokamalar tashkil etish va bayonotlarning o'zbek tilidagisini tayyorlash, tarqatish;

4.Tashkilot nashrlariga adabiy va texnik muharrirlik qilish;

5.Tashkilot nomidan muzokaralarda, uchrashuvlarda qatnashish;

6.Kongress uyushtiradigan uchrashuvlar va konferensiyalarga siyosiy tayyorgarlik ko'rish;

7.Tashkilotning O’zbekiston va boshqa o’lkalarda bo’limlarini tashkil etish;

8.Tashkilotning strategik va taktik siyosatidan kelib chiqib kundalik ishlarni demokratiyani yoyishga va diktaturaga qarshi tinch yo’llar bilan kurashga yo’naltirish;

9.Tashkilot a’zolari tomonidan ilgari suriladigan muammolar, savollar ustida ishlash;

10.Tashkilotning yilda bir marta e’lon qiladigan “Demokratiya do’stlari” va “Demokratiya dushmanlari” kitoblari muhokamasini uyushtirish va hokazo.

II. DO’K raisining birinchi o’rinbosari

1.Moliyaviy ishlarni boshqarish;

2.Tashkilotning iqtisody siyosati bilan birga uning iqtisodiy islohotlarga yo’nalgan dasturini tayyorlashga rahbarlik qilish;

3.Tashkilotining jamg’armasi, a’zolik badallari, xayriyalar kabi manbalardan keladigan mablag’lari sarfini nazorat qilish;

4.Tashkilotga grantlar olish ishini yo’lga qo’yish va hokazo.

III. Rais o’rinbosari(O’zbekistonda).

1.Tashkilotning O’zbekistondagi siyosiy strukturasini tuzish va uni ro’yxatdan o’tkazish uchun intilish;

2.Tashkilott faoliyatini mamlakat ichida targ’ib qilish ishlariga bosh bo’lish;

3.Viloyatlardagi vakillar faoliyatini muvofiqlashtirish, yig’ilishlar va konferensiyalar o’tkazish yo’llarini qidirish;

4.Tashkilot hujjatlari va nashrlarini yoyishni tashkil etish;

5.Tashkilot amalga oshiradigan tadqiqotlar-xorijiy radiolar dasturlarini monitoring qilish, korrupsiya, inson huquqlari kabi bir qator masalalar bo’yicha hisobotlar hozirlash kabi ishlarda yetakchilik qilish va hokazo;

6.Tashkilotning yilda bir marta e’lon qiladigan “Demokratiya do’stlari” va “Demokratiya dushmanlari” kitoblari muhokamasini mamlakat ichida ham uyushtirish va hokazo.

IV. Rais o’rinbosari (AQShda).

1. Tashkilot hujjatlarini Ingliz tilida tayyorlanishini va tarqatilishini tashkil etish, tashkilotning Ingliz, rus tillaridagi nashrlariga muharrirlik qilish;

2. AQSHdagi o’zbekistonliklar bilan yaqin aloqa o’rnatib, ular bilan uchrashuvlar tashkil etib, ularni DO’K faoliyatiga jalb qilish;

3. O’zbekistonlik qochqinlarning muammolari ustida ishlash;

4. Yilda bir marta AQSHda yashayotgan o’zbekistonliklarning oilaviy qurultoylarini tashkil qilish;

5. DO’Kni AQSHda tanitish ishlarini yo’lga qo’yish va hokazo.

V. Rais o’rinbosari (Avropa yoki MDH o’lkalaridan birida)

Tashkilotning mafkuraviy masalalari bilan shug’ullanadi. Nashrlarni chop etish, tarqatish ishlarini boshqaradi.

Saylanmaydigan lavozimlar:

1. IJROCHI DIREKTOR

Tashkilot rahbariyati tomonidan kontrakt asosida ishga olinadigan Ijrochi direktor DO’Kning protokol ishlari, kundalik faoliyatini yurgizadi. Barcha byrokratik ishlarni bajarish bilan birga tadbirlarni uyushtirish, tashkilot nomidan AQSh idoralari va muassaslari bilan kundalik aloqalarni yo’lga qo’yish, O’zbekiston va boshqa o’lkalardagi bo’limlar bilan birgalikda ish yuritish faoliyati bilan shug’ullanadi.

2. VEBMASTER

Tashkilot rahbariyati tomonidan kontrakt asosida ishga olinib, Tashkilotning veb sahifasini boshqaradi va kotibiyat ishlarini yuritadi.

Kotiba va Xazinachi

Kontrakt asosida xizmatga olinib, Tashkilotning kundalik ishlarini yuritish va tashkilot mulki qaydiyatini saqlash bilan shug’ullanadi.

Eslatma: mazkur NIZOM loyihasi dastlab elektron maktublashma asosida muhokama etilib, 2005 yil 25 Sentyabrdagi majlisda asos sifatida qabul qilingan va keyin Dekabr oxiri va 2006 yil Yanvar oyining boshida yana muhokama etilib, elektron maktublashma yo’li orqali qo’shimchalar qo’shilib, rahbariyat va Maslahat kengashiga kirganlarning ko’pchilik ovozi bilan tasdiqlangan).