DO’K

MAJLISI

30-1-2006, Vashington

Kecha 29 Yanvar kuni poytaxt Vashington doirasidagi Vienna shaharchasida Demokratik O’zbekiston Kongressi rahbariyatining majlisi bo’ldi.

Dastlab tashkilot raisi Jahongir Mamatov DO’Kning Dasturi borasida bir oy davom etgan muhokamalarni yakunlab, bu borada ochiq bahslar bo’lgani, yaxshi takliflar aytilgani, ayniqsa O’zbekistonning turli viloyatlari va poytaxtida ham ziyolilar bu masalaga o’z qarashlarini bildirganlariga to’xtaldi. Uning taklifi bilan ishchi guruhi tuzilib, Dastur chizgilari va tushgan takliflar asosida DO’Kning dastur loyihasini tayyorlashga va shundan keyin uni qabul qilishga kelishib olindi.

Birinchi Fevraldan e’tiboran tashkilotning muhim odimlaridan bo’lgan “Demokratiya do’stlari” va “Demokratiya dushmanlari” kitoblarini hozirlashga kirishish qarorga bog’landi. DO’Kning yaqin kelajakda amalga oshiradigan amaliy ishlari haqida uning vebsaytida ma’lumotnoma e’lon qilinishi borasida ham bir to’xtamga kelindi.

Tashkilotning iqtisodiy odimlari haqida esa rais o’rinbosari Zokir Alining axboroti eshitildi. Shaffoflik nuqtai nazaridan DO’Kning kirim va chiqimlari haqida ilgari bo’lgani kabi bu oy natijalari bo’yicha ham hisobot tashkilot faollariga tarqatilishi ma’lum qilindi.

Yig’ilishda DO’K faoliyati bilan bog’liq boshqa masalalar ham muhokama etildi. Jamshid Ochilov, Razzoq Karim, Xurshid Bek, Sobit Shoh va boshqalarning mulohazalari tinglandi.

Yig’ilish qatnashchilari hozirgi vaziyatni ham muhokama etib, O’zbekistonning Rossiya bilan munosabatlari bir tomonloma, Kreml manfaatlari og’ir bosgan holda amalga oshirilayotganidan tashvish bildirdilar.

DO’K MATBUOT XIZMATI